dil-e-na-subur ko phir wahi but-e-bewafa ki talash hai

dil-e-nā-subūr ko phir vahī but-e-bevafā kī talāsh hai

ġham-e-ibtidā to uThā chukā ġham-e-intihā kī talāsh hai

kisī be-vafā kā gila bhī hai kisī bā-vafā kī talāsh hai

ye fareb-e-shauq ki dil ko phir kisī āshnā kī talāsh hai

tirā ġham hī ġham rahe 'umr-bhar tire ġham meñ ḳhud ko fanā karūñ

mujhe ibtidā-e-shu.ūr se isī intihā kī talāsh hai

ye vo jins hai ki jahān meñ jo na bik sake jo na mil sake

tujhe kyuuñ vafā kā junūn hai tujhe kyuuñ vafā kī talāsh hai

jo mile bhī ḳhizr to ab kahūñ ki salām āb-e-hayāt ko

na vo dil ko zauq-e-talab rahā na vo rahnumā kī talāsh hai

dil-e-nā-sazā ko ye chāhtā huuñ ki chaah meñ kahīñ Daal duuñ

use hai gunāh kī justujū to mujhe sazā kī talāsh hai

na.e hausle na.e valvale mirī justujū meñ mudām haiñ

mujhe intihā-e-talāsh meñ bhī to ibtidā kī talāsh hai

tire is ‘ilāj meñ dam nahīñ tirī bas kā rog ye ġham nahīñ

mire dard ke liye chāragar tujhe kyuuñ davā kī talāsh hai

mujhe justujū hai junūn kī mujhe be-ḳhudī kī hai aarzū

mire kārvān-e-hayāt ko kisī rahnumā kī talāsh hai

tire saath hai tire paas hai na judā samajh vo judā nahīñ

ye ḳhudī kā parda uThā ke dekh agar haañ ḳhudā kī talāsh hai

ye hai hashr-e-'ḳhushtar'-e-nā-tavāñ yahāñ nafsī-nafsī kā hai samāñ

mujhe ab hujūm-e-gunāh meñ shah-e-dosarā kī talāsh hai

dil-e-na-subur ko phir wahi but-e-bewafa ki talash hai

gham-e-ibtida to uTha chuka gham-e-intiha ki talash hai

kisi be-wafa ka gila bhi hai kisi ba-wafa ki talash hai

ye fareb-e-shauq ki dil ko phir kisi aashna ki talash hai

tera gham hi gham rahe 'umr-bhar tere gham mein KHud ko fana karun

mujhe ibtida-e-shuur se isi intiha ki talash hai

ye wo jins hai ki jahan mein jo na bik sake jo na mil sake

tujhe kyun wafa ka junun hai tujhe kyun wafa ki talash hai

jo mile bhi KHizr to ab kahun ki salam aab-e-hayat ko

na wo dil ko zauq-e-talab raha na wo rahnuma ki talash hai

dil-e-na-saza ko ye chahta hun ki chah mein kahin Dal dun

use hai gunah ki justuju to mujhe saza ki talash hai

nae hausle nae walwale meri justuju mein mudam hain

mujhe intiha-e-talash mein bhi to ibtida ki talash hai

tere is ‘ilaj mein dam nahin teri bas ka rog ye gham nahin

mere dard ke liye chaaragar tujhe kyun dawa ki talash hai

mujhe justuju hai junun ki mujhe be-KHudi ki hai aarzu

mere karwan-e-hayat ko kisi rahnuma ki talash hai

tere sath hai tere pas hai na juda samajh wo juda nahin

ye KHudi ka parda uTha ke dekh agar han KHuda ki talash hai

ye hai hashr-e-'KHushtar'-e-na-tawan yahan nafsi-nafsi ka hai saman

mujhe ab hujum-e-gunah mein shah-e-dosara ki talash hai