dil-e-nadan mera hai be-taqsir

dil-e-nādāñ mirā hai be-taqsīr

zab.h karte ho uus kuuñ be-takbīr

naqsh-e-dīvār sehn-e-gulshan hai

jis ne dekhā hai yaar kī tasvīr

āshiqoñ kuuñ nahīñ hai rusvā.ī

mus.haf-e-ishq kī hai ye tafsīr

gardish-e-chashm-e-yār bejā nahīñ

dil ke lene kī hai use tadbīr

bul-havas kab talak rahe āzād

khol sayyād zulf kī zanjīr

jāntī hai vo zulf-e-uqda-kushā

mere āshufta ḳhvāb kī ta.abīr

shab-e-hijrāñ meñ ai 'sirāj' mujhe

ashk hai sham.a aur palak gul-gīr

dil-e-nadan mera hai be-taqsir

zabh karte ho us kun be-takbir

naqsh-e-diwar sehn-e-gulshan hai

jis ne dekha hai yar ki taswir

aashiqon kun nahin hai ruswai

mushaf-e-ishq ki hai ye tafsir

gardish-e-chashm-e-yar beja nahin

dil ke lene ki hai use tadbir

bul-hawas kab talak rahe aazad

khol sayyaad zulf ki zanjir

jaanti hai wo zulf-e-uqda-kusha

mere aashufta KHwab ki tabir

shab-e-hijran mein ai 'siraj' mujhe

ashk hai shama aur palak gul-gir