dil-e-raqib to dekha mera jigar dekhen

dil-e-raqīb to dekhā mirā jigar dekheñ

udhar ke dekhne vaale zarā idhar dekheñ

kisī ke husn pe haiñ aisī shefta āñkheñ

parī jo sāmne aa.e na ek nazar dekheñ

abhī nahā.e haiñ kapḌe badalne baiThe haiñ

majāl kyā hai hamārī jo ham udhar dekheñ

hazāroñ sūrat-e-mūsā haiñ tālib-e-dīdār

jo ek ho to vo dekheñ kidhar kidhar dekheñ

hamāre dil meñ jo hasrat hai jo tamanna hai

na māneñge na sahī aaj arz kar dekheñ

koī jagah nahīñ ḳhālī hai tere jalve se

kahāñ kahāñ tujhe dekheñ kidhar kidhar dekheñ

jo iztirābī-e-dil kā na ho yaqīn un ko

hamārī tarah se vo bhī kisī pe mar dekheñ

raqīb aa.ina 'naushād' aur dil-e-'naushād'

vo ek dekhne vaale kidhar kidhar dekheñ

dil-e-raqib to dekha mera jigar dekhen

udhar ke dekhne wale zara idhar dekhen

kisi ke husn pe hain aisi shefta aankhen

pari jo samne aae na ek nazar dekhen

abhi nahae hain kapDe badalne baiThe hain

majal kya hai hamari jo hum udhar dekhen

hazaron surat-e-musa hain talib-e-didar

jo ek ho to wo dekhen kidhar kidhar dekhen

hamare dil mein jo hasrat hai jo tamanna hai

na manenge na sahi aaj arz kar dekhen

koi jagah nahin KHali hai tere jalwe se

kahan kahan tujhe dekhen kidhar kidhar dekhen

jo iztirabi-e-dil ka na ho yaqin un ko

hamari tarah se wo bhi kisi pe mar dekhen

raqib aaina 'naushad' aur dil-e-'naushad'

wo ek dekhne wale kidhar kidhar dekhen