dil-e-shikasta ki nim-jaan KHwahishon ko jina sikha rahi hai

dil-e-shikasta kī nīm-jāñ ḳhvāhishoñ ko jiinā sikhā rahī hai

nigāh-e-afsūñ-bayān us kī butoñ se sajda karā rahī hai

ye phuul ḳhushbū ye chāñd-tāre ye girtī būñdeñ ye abr-pāre

sab us kī aamad ke muntazir haiñ vo ḳhud ko sabse chhupā rahī hai

ye chāñdnī meñ nahāyā dariyā ye mahfil-e-shab bhī ḳhuub lekin

maiñ chāñd par jā rahā huuñ mujh ko vo ik za.īfa bulā rahī hai

jo reg-e-dil pe likhā hai us ko dukhoñ kā paanī miTā na Daale

maiñ ḳhvāb dekhe hī jā rahā huuñ ye aañkh barse hī jā rahī hai

kabhī ḳhamoshī kabhī tabassum kabhī ḳhayāloñ kī dhuñd meñ gum

mirī udāsī to har qadam par qabā badaltī hī jā rahī hai

vo ḳhush-bayāñ 'imtiyāz' vo lafz lafz jaadū chalāne vaalā

vo kal milā thā to kah rahā thā ḳhamoshī andar se khā rahī hai

dil-e-shikasta ki nim-jaan KHwahishon ko jina sikha rahi hai

nigah-e-afsun-bayan us ki buton se sajda kara rahi hai

ye phul KHushbu ye chand-tare ye girti bunden ye abr-pare

sab us ki aamad ke muntazir hain wo KHud ko sabse chhupa rahi hai

ye chandni mein nahaya dariya ye mahfil-e-shab bhi KHub lekin

main chand par ja raha hun mujh ko wo ek zaifa bula rahi hai

jo reg-e-dil pe likha hai us ko dukhon ka pani miTa na Dale

main KHwab dekhe hi ja raha hun ye aankh barse hi ja rahi hai

kabhi KHamoshi kabhi tabassum kabhi KHayalon ki dhund mein gum

meri udasi to har qadam par qaba badalti hi ja rahi hai

wo KHush-bayan 'imtiyaz' wo lafz lafz jadu chalane wala

wo kal mila tha to kah raha tha KHamoshi andar se kha rahi hai