dil-e-shorida-sar hai aur main hun

dil-e-shorīda-sar hai aur maiñ huuñ

harīf-e-fitna-gar hai aur maiñ huuñ

ġham-e-shām-o-sahar hai aur maiñ huuñ

sitāroñ par nazar hai aur maiñ huuñ

kisī kā sang-e-dar hai aur maiñ huuñ

ilāj-e-dard-e-sar hai aur maiñ huuñ

jise kahiye balā-e-ahd-e-pīrī

vo shām-e-be-sahar hai aur maiñ huuñ

jo pahle thā ġham-e-dil aaj bhī vo

ba-unvān-e-digar hai aur maiñ huuñ

vo apnā dil udhar bahlā rahe haiñ

idhar dard-e-jigar hai aur maiñ huuñ

qayāmat bhī vahīñ barpā huī hai

jahāñ un kī nazar hai aur maiñ huuñ

abhī baaqī haiñ do āvāra-e-dasht

rah-e-ġham meñ ḳhizar hai aur maiñ huuñ

ḳhudā jaane mujhe kyā ho gayā hai

savāl-e-muḳhtasar hai aur maiñ huuñ

bajā hai kyoñ yahāñ aane lage tum

ye ik vīrāñ sā ghar hai aur maiñ huuñ

dil-e-shorida-sar hai aur main hun

harif-e-fitna-gar hai aur main hun

gham-e-sham-o-sahar hai aur main hun

sitaron par nazar hai aur main hun

kisi ka sang-e-dar hai aur main hun

ilaj-e-dard-e-sar hai aur main hun

jise kahiye bala-e-ahd-e-piri

wo sham-e-be-sahar hai aur main hun

jo pahle tha gham-e-dil aaj bhi wo

ba-unwan-e-digar hai aur main hun

wo apna dil udhar bahla rahe hain

idhar dard-e-jigar hai aur main hun

qayamat bhi wahin barpa hui hai

jahan un ki nazar hai aur main hun

abhi baqi hain do aawara-e-dasht

rah-e-gham mein KHizar hai aur main hun

KHuda jaane mujhe kya ho gaya hai

sawal-e-muKHtasar hai aur main hun

baja hai kyon yahan aane lage tum

ye ek viran sa ghar hai aur main hun