dil-e-wahshi ka afsana kahega tum bhi sun lena

dil-e-vahshī kā afsāna kahegā tum bhī sun lenā

junūñ ke raaz dīvāna kahegā tum bhī sun lenā

vo dil jis se miTā.e de rahe ho yaad tum apnī

zamāna us ko vīrāna kahegā tum bhī sun lenā

zabān-e-ḳhalq kā shāyad na tum ko e'tibār aa.e

ḳhud apnā haal dīvāna kahegā tum bhī sun lenā

dil-e-nazzāra jo har baat us husn-e-mujassam se

ba-andāz-e-kalīmāna kahegā tum bhī sun lenā

'munavvar' bahkī bahkī guftugū yūñhī kiye jaao

tumheñ har shaḳhs dīvāna kahegā tum bhī sun lenā

dil-e-wahshi ka afsana kahega tum bhi sun lena

junun ke raaz diwana kahega tum bhi sun lena

wo dil jis se miTae de rahe ho yaad tum apni

zamana us ko virana kahega tum bhi sun lena

zaban-e-KHalq ka shayad na tum ko e'tibar aae

KHud apna haal diwana kahega tum bhi sun lena

dil-e-nazzara jo har baat us husn-e-mujassam se

ba-andaz-e-kalimana kahega tum bhi sun lena

'munawwar' bahki bahki guftugu yunhi kiye jao

tumhein har shaKHs diwana kahega tum bhi sun lena