dil-e-wahshi se pyar kaun kare

dil-e-vahshī se pyaar kaun kare

jabr ko iḳhtiyār kaun kare

rā.egāñ saarī mehnateñ hoñgī

jam.a dāman ke taar kaun kare

ashk-e-ḳhūnīñ haiñ gul khilāne ko

intizār-e-bahār kaun kare

ham na hoñ gar sharīk-e-mahfil-e-nāz

un ko phir sharmsār kaun kare

ham ko ḳhud intizār hai apnā

aap kā intizār kaun kare

dil pe apne nahīñ hai jab qaabū

un se qaul-o-qarār kaun kare

ham to lāla-ruḳhoñ se baaz aa.e

siine ko dāġhdār kaun kare

ham hī shikvoñ se baaz aa.eñ 'nadīm'

un ko phir ashk-bār kaun kare

dāġh-e-dil mat kured ai 'naqvī'

sair-e-zaḳhm-e-bahār kaun kare

dil-e-wahshi se pyar kaun kare

jabr ko iKHtiyar kaun kare

raegan sari mehnaten hongi

jama daman ke tar kaun kare

ashk-e-KHunin hain gul khilane ko

intizar-e-bahaar kaun kare

hum na hon gar sharik-e-mahfil-e-naz

un ko phir sharmsar kaun kare

hum ko KHud intizar hai apna

aap ka intizar kaun kare

dil pe apne nahin hai jab qabu

un se qaul-o-qarar kaun kare

hum to lala-ruKHon se baz aae

sine ko daghdar kaun kare

hum hi shikwon se baz aaen 'nadim'

un ko phir ashk-bar kaun kare

dagh-e-dil mat kured ai 'naqwi'

sair-e-zaKHm-e-bahaar kaun kare