دل وحشی سے پیار کون کرے

دل وحشی سے پیار کون کرے

جبر کو اختیار کون کرے

رائیگاں ساری محنتیں ہوں گی

جمع دامن کے تار کون کرے

اشک خونیں ہیں گل کھلانے کو

انتظار بہار کون کرے

ہم نہ ہوں گر شریک محفل ناز

ان کو پھر شرمسار کون کرے

ہم کو خود انتظار ہے اپنا

آپ کا انتظار کون کرے

دل پہ اپنے نہیں ہے جب قابو

ان سے قول و قرار کون کرے

ہم تو لالہ رخوں سے باز آئے

سینے کو داغ دار کون کرے

ہم ہی شکوؤں سے باز آئیں ندیمؔ

ان کو پھر اشک بار کون کرے

داغ دل مت کرید اے نقویؔ

سیر زخم بہار کون کرے