dil-e-viran bhi tha maskan kisi ka

dil-e-vīrāñ bhī thā maskan kisī kā

usī meñ nuur thā raushan kisī kā

gaḌhī hai aarzū zinda hai hasrat

kisī kā ghar hai dil madfan kisī kā

bapā hai shor-e-mahshar qatl-gah meñ

kisī kā haath hai dāman kisī kā

do-ālam ko tah-o-bālā na kar de

badalnā naaz hai chitvan kisī kā

gulistāñ meñ zarā jā kar to dekho

kisī kī ḳhandgī shevan kisī kā

bharosā charḳh par ai dil na karnā

huā kab dost ye pur-fan kisī kā

charāġh-e-ishq hai aañsū se raushan

kisī kā ḳhūn-e-dil roġhan kisī kā

tamannā shauq se nigarāñ hai is meñ

kisī kā zaḳhm-e-dil rauzan kisī kā

'jamīla' dasht meñ kahtī thī ro kar

ilāhī dil na ho dushman kisī kā

dil-e-viran bhi tha maskan kisi ka

usi mein nur tha raushan kisi ka

gaDhi hai aarzu zinda hai hasrat

kisi ka ghar hai dil madfan kisi ka

bapa hai shor-e-mahshar qatl-gah mein

kisi ka hath hai daman kisi ka

do-alam ko tah-o-baala na kar de

badalna naz hai chitwan kisi ka

gulistan mein zara ja kar to dekho

kisi ki KHandgi shewan kisi ka

bharosa charKH par ai dil na karna

hua kab dost ye pur-fan kisi ka

charagh-e-ishq hai aansu se raushan

kisi ka KHun-e-dil roghan kisi ka

tamanna shauq se nigaran hai is mein

kisi ka zaKHm-e-dil rauzan kisi ka

'jamila' dasht mein kahti thi ro kar

ilahi dil na ho dushman kisi ka