dil-e-zinda KHud rahnuma ho gaya

dil-e-zinda ḳhud rahnumā ho gayā

ye qibla hī qibla-numā ho gayā

huā rañg-e-duniyā meñ kyuuñ shefta

tujhe bul-havas haa.e kyā ho gayā

ye parda hī thā parda-posh-e-nazar

hijāb uTh gayā ḳhud-numā ho gayā

yahī ḳhud-shanāsī ḳhudā.ī huī

ḳhudī miT ga.ī jab ḳhudā ho gayā

anal-haq hual-haq jo aayā nazar

ye shorīda-sar ḳhud-numā ho gayā

ta.arruz hual-haq jo aayā nazar

ta.ashshuq meñ sab faisla ho gayā

tajallī huī jis ko tauhīd kī

vo qaid-e-duī se rihā ho gayā

ye kyā chiiz thā 'sāqī' hech-kas

tire fazl se kyā se kyā ho gayā

dil-e-zinda KHud rahnuma ho gaya

ye qibla hi qibla-numa ho gaya

hua rang-e-duniya mein kyun shefta

tujhe bul-hawas hae kya ho gaya

ye parda hi tha parda-posh-e-nazar

hijab uTh gaya KHud-numa ho gaya

yahi KHud-shanasi KHudai hui

KHudi miT gai jab KHuda ho gaya

anal-haq hual-haq jo aaya nazar

ye shorida-sar KHud-numa ho gaya

tarruz hual-haq jo aaya nazar

tashshuq mein sab faisla ho gaya

tajalli hui jis ko tauhid ki

wo qaid-e-dui se riha ho gaya

ye kya chiz tha 'saqi' hech-kas

tere fazl se kya se kya ho gaya