dil gae aafat aai jaanon par

dil ga.e aafat aa.ī jānoñ par

ye fasāna rahā zabānoñ par

'ishq meñ hosh o sabr sunte the

rakh ga.e haath so to kānoñ par

garche insān haiñ zamīñ se vale

haiñ dimāġh un ke āsmānoñ par

shahr ke shoḳh sāda-rū laḌke

zulm karte haiñ kyā javānoñ par

'arsh o dil donoñ kā hai paaya buland

sair rahtī hai un makānoñ par

jab se bāzār meñ hai tujh sī matā'

bhiiḌ hī rahtī hai dukānoñ par

log sar dene jaate haiñ kab se

yaar ke paañv ke nishānoñ par

kajī aubāsh kī hai vo dar-band

Daale phirtā hai band shānoñ par

koī bolā na qatl meñ mere

mohr kī thī magar dahānoñ par

yaad meñ us ke sāq-e-sīmīñ kī

de de mārūñ huuñ haath rānoñ par

the zamāne meñ ḳharchī jin kī rupe

phāñsā karte haiñ un ko aanoñ par

ġham o ġhussa hai hisse meñ mere

ab ma'īshat hai un hī khānoñ par

qisse duniyā meñ 'mīr' bahut sune

na rakho gosh un fasānoñ par

dil gae aafat aai jaanon par

ye fasana raha zabanon par

'ishq mein hosh o sabr sunte the

rakh gae hath so to kanon par

garche insan hain zamin se wale

hain dimagh un ke aasmanon par

shahr ke shoKH sada-ru laDke

zulm karte hain kya jawanon par

'arsh o dil donon ka hai paya buland

sair rahti hai un makanon par

jab se bazar mein hai tujh si mata'

bhiD hi rahti hai dukanon par

log sar dene jate hain kab se

yar ke panw ke nishanon par

kaji aubash ki hai wo dar-band

Dale phirta hai band shanon par

koi bola na qatl mein mere

mohr ki thi magar dahanon par

yaad mein us ke saq-e-simin ki

de de marun hun hath ranon par

the zamane mein KHarchi jin ki rupe

phansa karte hain un ko aanon par

gham o ghussa hai hisse mein mere

ab ma'ishat hai un hi khanon par

qisse duniya mein 'mir' bahut sune

na rakho gosh un fasanon par