dil ghamon ka maKHzan hai hasraton ka maskan hai

dil ġhamoñ kā maḳhzan hai hasratoñ kā maskan hai

phir bhī sāya-e-ummīd us meñ sāya-afgan hai

kohnagī ke dāman meñ dahr kā nayā-pan hai

qasr hai jo madfan thā baaġh thā vo jo ban hai

muḳhtasar agar kiije sharh-e-lafz ulfat kī

raat din kī uljhan hai umr bhar kī sulgan hai

ḳhūn-e-dil se likkhā hai mahzar-e-vafā dekho

kis qadar murassā hai kis qadar muzayyan hai

kam bisāt parvāna soz-e-ishq kyā jaane

jal bujhā vo ik lau par yaañ mudām sulgan hai

shauq-e-dil hudī-ḳhvāñ hai kārvān-e-mastī meñ

kis ko fikr-e-rahbar hai kis ko ḳhauf-e-rahzan hai

apne ḳhush-nasīboñ kā haal bhī kabhī sun lo

maut muñh churātī hai zindagī ajīran hai

saarī umr tarse haiñ us ke ik tabassum ko

kis qadar hayā-parvar zindagī kī dulhan hai

ham ḳhulūs ke bande ham vafā ke dīvāne

ai 'rashīd' kyā jāneñ dostī bhī ik fan hai

dil ghamon ka maKHzan hai hasraton ka maskan hai

phir bhi saya-e-ummid us mein saya-afgan hai

kohnagi ke daman mein dahr ka naya-pan hai

qasr hai jo madfan tha bagh tha wo jo ban hai

muKHtasar agar kije sharh-e-lafz ulfat ki

raat din ki uljhan hai umr bhar ki sulgan hai

KHun-e-dil se likkha hai mahzar-e-wafa dekho

kis qadar murassa hai kis qadar muzayyan hai

kam bisat parwana soz-e-ishq kya jaane

jal bujha wo ek lau par yan mudam sulgan hai

shauq-e-dil hudi-KHwan hai karwan-e-masti mein

kis ko fikr-e-rahbar hai kis ko KHauf-e-rahzan hai

apne KHush-nasibon ka haal bhi kabhi sun lo

maut munh churaati hai zindagi ajiran hai

sari umr tarse hain us ke ek tabassum ko

kis qadar haya-parwar zindagi ki dulhan hai

hum KHulus ke bande hum wafa ke diwane

ai 'rashid' kya jaanen dosti bhi ek fan hai