دل گلو بستۂ بلا نکلا

دل گلو بستۂ بلا نکلا

کھول زلفیں کہ دم مرا نکلا

تم بھلے غیر بھی بھلا نکلا

بندگی بندہ گر برا نکلا

کہیں بے وجہ تھی پریشانی

زلف سے دل کا سلسلہ نکلا

دل و جاں و جگر قرار و شکیب

ایک بھی تو نہ کام کا نکلا

رشک دشمن تو کوئی بات نہیں

خیر بندہ ہی بے وفا نکلا

ناتوانی میں سخت جانی ہائے

ضعف بھی طاقت آزما نکلا

تیرے کوچہ میں نقش پا کی طرح

مٹ گیا میں جو کوئی آ نکلا

یاں کسے ہے دماغ نکہت گل

دم مرا جنبش صبا نکلا

آخر آئے مری عیادت کو

درد دل خوب جاں فزا نکلا

زخم دل پر ذرا نمک چھڑکو

پھر بھر آیا تو کیا مزہ نکلا

بت پرستی کوئی گناہ نہیں

میں اگر بندۂ خدا نکلا

مر گئے ابتدائے عشق میں ہم

آسماں کا نہ حوصلہ نکلا

کیا کروں اس کا کچھ علاج نہیں

غیر بھی درد آشنا نکلا

شعلہؔ پہلو میں کچھ تو جھگڑا ہے

دل بیتاب کیوں خفا نکلا