dil hai aur KHud nagri zauq-e-dua jis ko kahen

dil hai aur ḳhud nagrī zauq-e-duā jis ko kaheñ

be-ḳhudī chāhiye ham ko ki ḳhudā jis ko kaheñ

ham se ābād hai duniyā-e-tasavvur to kyā

ki nahīñ ek vo tasvīr ḳhudā jis ko kaheñ

jur.at-e-shauq hai kahte haiñ mohabbat jis ko

usī jur.at pe hai isrār-e-vafā jis ko kaheñ

samajh ai dost use zarb-e-nazar kī āvāz

ham kabhī dil ke dhaḌakne kī sadā jis ko kaheñ

qulzum-e-dil na huā ā.īna-sāmāñ ai dost

abhī aa jaatī hai ik mauj-e-duā jis ko kaheñ

hai tire kīsa-e-pindār meñ aisī koī chiiz

dil kī betāb mohabbat kā sila jis ko kaheñ

dil hai aur KHud nagri zauq-e-dua jis ko kahen

be-KHudi chahiye hum ko ki KHuda jis ko kahen

hum se aabaad hai duniya-e-tasawwur to kya

ki nahin ek wo taswir KHuda jis ko kahen

jurat-e-shauq hai kahte hain mohabbat jis ko

usi jurat pe hai israr-e-wafa jis ko kahen

samajh ai dost use zarb-e-nazar ki aawaz

hum kabhi dil ke dhaDakne ki sada jis ko kahen

qulzum-e-dil na hua aaina-saman ai dost

abhi aa jati hai ek mauj-e-dua jis ko kahen

hai tere kisa-e-pindar mein aisi koi chiz

dil ki betab mohabbat ka sila jis ko kahen