dil hai ek hi lekin nam-e-dil badalta hai

dil hai ek hī lekin nām-e-dil badaltā hai

saj gayā to gulshan hai luT gayā to sahrā hai

merā dard-e-mahrūmī ik nayā taqāzā hai

ishq rā.egāñ kyoñ ho tum nahīñ to duniyā hai

husn hai bahāreñ haiñ shauq hai tamāshā hai

āshiqī kī nisbat se zindagī gavārā hai

dard-o-ġham kī rāhoñ meñ saath chhoḌnā kaisā

duur tak chale aao duur tak añdherā hai

kal tire tasavvur ne mahfileñ sajā.ī thiiñ

aaj dil kī duniyā meñ terī yaad tanhā hai

zulmatoñ kā ronā kyā ahl-e-kārvāñ hoshyār

us taraf haiñ rahzan bhī jis taraf ujālā hai

raushnī meñ Dhaltī hai dil ke ḳhuun kī surḳhī

tab kahīñ sar-e-mizhgāñ ik charāġh jaltā hai

gard-e-rāh-e-insāñ haiñ māh-o-kahkashāñ 'shāhid'

justujū-e-paiham kā hashr kis ne dekhā hai

dil hai ek hi lekin nam-e-dil badalta hai

saj gaya to gulshan hai luT gaya to sahra hai

mera dard-e-mahrumi ek naya taqaza hai

ishq raegan kyon ho tum nahin to duniya hai

husn hai bahaaren hain shauq hai tamasha hai

aashiqi ki nisbat se zindagi gawara hai

dard-o-gham ki rahon mein sath chhoDna kaisa

dur tak chale aao dur tak andhera hai

kal tere tasawwur ne mahfilen sajai thin

aaj dil ki duniya mein teri yaad tanha hai

zulmaton ka rona kya ahl-e-karwan hoshyar

us taraf hain rahzan bhi jis taraf ujala hai

raushni mein Dhalti hai dil ke KHun ki surKHi

tab kahin sar-e-mizhgan ek charagh jalta hai

gard-e-rah-e-insan hain mah-o-kahkashan 'shahid'

justuju-e-paiham ka hashr kis ne dekha hai