dil hai ki qarib itna ai kash tu aa jae

dil hai ki qarīb itnā ai kaash tū aa jaa.e

maiñ tujh meñ samā jā.ūñ tū mujh meñ samā jaa.e

maiñ hañs ke luTā duuñ sab jī jaan se luT jā.ūñ

gur naam tumhāre par luTne kā kahā jaa.e

bīmār-e-mohabbat ko mumkin hai shifā ab bhī

vo shaḳhs bulā laao dīdār karā jaa.e

is duniyā parā.ī meñ ik shaḳhs jo apnā thā

kuchh 'aib nahīñ gar ab begāna kahā jaa.e

maiñ saath nibhāne kī koshish meñ rahā barsoñ

be-kār kī mehnat ko kyā naam diyā jaa.e

vo rasm-e-mohabbat to qāsir thā nibhāne se

ab rasm-e-‘adāvat hī himmat se nibhā jaa.e

ab se dil-e-'mīsam' meñ an-honī kā ḳhadsha hai

lāzim hai tujhe dil se ab duur kiyā jaa.e

dil hai ki qarib itna ai kash tu aa jae

main tujh mein sama jaun tu mujh mein sama jae

main hans ke luTa dun sab ji jaan se luT jaun

gur nam tumhaare par luTne ka kaha jae

bimar-e-mohabbat ko mumkin hai shifa ab bhi

wo shaKHs bula lao didar kara jae

is duniya parai mein ek shaKHs jo apna tha

kuchh 'aib nahin gar ab begana kaha jae

main sath nibhane ki koshish mein raha barson

be-kar ki mehnat ko kya nam diya jae

wo rasm-e-mohabbat to qasir tha nibhane se

ab rasm-e-‘adawat hi himmat se nibha jae

ab se dil-e-'misam' mein an-honi ka KHadsha hai

lazim hai tujhe dil se ab dur kiya jae