dil hai kyon girya-e-be-ashk se pur-nur bahut

dil hai kyoñ girya-e-be-ashk se pur-nūr bahut

tum bahut paas ho yā ḳhud se haiñ ham duur bahut

jalva-e-husn se dil kyā rahe māmūr bahut

mauj sāhil ke kabhī paas kabhī duur bahut

naam isī farq kā hai kashmakash-e-ġham shāyad

tum karam karte ho kam-kam hameñ manzūr bahut

istitā.at hai jinheñ un ko kuchh ehsās nahīñ

jin kā ehsās hai zinda vo haiñ majbūr bahut

marg-e-be-fāsla hai bā-ḳhabarī kā jiinā

apnī ġhaflat se hai jo koī hai masrūr bahut

kab se huuñ ham-qadam-e-vaqt-e-gurezāñ lekin

duur hai manzil-e-maqsūd ba-dastūr bahut

sirf ālām se hī dil nahīñ hotā ġhamgīñ

ba.az ḳhushiyāñ bhī banā detī haiñ ranjūr bahut

kyā na kartī rahī duniyā hameñ apnāne ko

kam-dimāġhī se rahe kuchh hamī maġhrūr bahut

dil meñ rakh kar tumheñ gumnām ke gumnām haiñ ham

tuur ik barq-e-tajallī se hai mash.hūr bahut

kahīñ hañste hue chehroñ se na dhokā khānā

dil TaTologe to mil jā.eñge nāsūr bahut

zindagī vaqt kā ḳhud sab se baḌā hādisa hai

jis ko dekho vo hai hālāt se majbūr bahut

'shauq' kyā jalva-e-be-parda kī ḳhvāhish kiije

hosh uḌāne ko hai ik jalva-e-mastūr bahut

dil hai kyon girya-e-be-ashk se pur-nur bahut

tum bahut pas ho ya KHud se hain hum dur bahut

jalwa-e-husn se dil kya rahe mamur bahut

mauj sahil ke kabhi pas kabhi dur bahut

nam isi farq ka hai kashmakash-e-gham shayad

tum karam karte ho kam-kam hamein manzur bahut

istitaat hai jinhen un ko kuchh ehsas nahin

jin ka ehsas hai zinda wo hain majbur bahut

marg-e-be-fasla hai ba-KHabari ka jina

apni ghaflat se hai jo koi hai masrur bahut

kab se hun ham-qadam-e-waqt-e-gurezan lekin

dur hai manzil-e-maqsud ba-dastur bahut

sirf aalam se hi dil nahin hota ghamgin

baz KHushiyan bhi bana deti hain ranjur bahut

kya na karti rahi duniya hamein apnane ko

kam-dimaghi se rahe kuchh hami maghrur bahut

dil mein rakh kar tumhein gumnam ke gumnam hain hum

tur ek barq-e-tajalli se hai mashhur bahut

kahin hanste hue chehron se na dhoka khana

dil TaTologe to mil jaenge nasur bahut

zindagi waqt ka KHud sab se baDa hadisa hai

jis ko dekho wo hai haalat se majbur bahut

'shauq' kya jalwa-e-be-parda ki KHwahish kije

hosh uDane ko hai ek jalwa-e-mastur bahut