دل ہے مرا چراغ ترا غم ہے روشنی

دل ہے مرا چراغ ترا غم ہے روشنی

میں پھر بھی کہہ رہا ہوں بہت کم ہے روشنی

پیاسے کو آب دید نہیں زندگی سے کم

تشنہ کوئی نظر میں ہو زمزم ہے روشنی

اتنا قریب جاں ہو کہ محسوس کر سکوں

میں کم نظر ہوں اور بہت کم ہے روشنی

ہم راہ جا رہا ہے مرے آفتاب بھی

اس روشنی کے ساتھ کوئی دم ہے روشنی

لپٹی ہوئی ہو کہر میں جیسے کرن کرن

یہ کون رو رہا ہے کہ پرنم ہے روشنی

میں نے وہ خواب گاہ بھی دیکھی نصیب سے

سورج طواف میں ہے جہاں خم ہے روشنی

طاہرؔ ابھی تو ہجر کی گزری ہے پہلی رات

بے سدھ چراغ ہیں سبھی بے دم ہے روشنی