dil hai sahra se kuchh udas bahut

dil hai sahrā se kuchh udaas bahut

ghar ko vīrāñ karūñ to ghaas bahut

ro.ab paḌ jaa.e us pe lahje kā

mudda.ā kam ho iltimās bahut

merī tanhā.iyoñ kī duniyā meñ

log rahte haiñ ās-pās bahut

hai ajab haal ġham ke sūraj kā

raushnī kam hai in.ikās bahut

mutma.in dil ho kyā haqīqat se

hai mirī soch meñ qayās bahut

log marte haiñ ik ḳhushī ke liye

ham masarrat meñ haiñ udaas bahut

dūr-uftāda-e-chaman ke liye

ek hī phuul kī hai baas bahut

ḳhadd-o-ḳhāl us ke aur ye chehre

aise dekhe haiñ iqtibās bahut

jis se mansūb talḳhiyāñ haiñ 'nazar'

us ke lahje meñ hai miThās bahut

dil hai sahra se kuchh udas bahut

ghar ko viran karun to ghas bahut

roab paD jae us pe lahje ka

muddaa kam ho iltimas bahut

meri tanhaiyon ki duniya mein

log rahte hain aas-pas bahut

hai ajab haal gham ke suraj ka

raushni kam hai inikas bahut

mutmain dil ho kya haqiqat se

hai meri soch mein qayas bahut

log marte hain ek KHushi ke liye

hum masarrat mein hain udas bahut

dur-uftada-e-chaman ke liye

ek hi phul ki hai bas bahut

KHadd-o-KHal us ke aur ye chehre

aise dekhe hain iqtibas bahut

jis se mansub talKHiyan hain 'nazar'

us ke lahje mein hai miThas bahut