دل ہے تمہاری یاد کی دنیا لئے ہوئے

دل ہے تمہاری یاد کی دنیا لئے ہوئے

میں بھی ہوں ایک حسن سراپا لئے ہوئے

مجھ کو کیا تباہ ترے التفات نے

یہ روشنی تھی کتنا اندھیرا لئے ہوئے

وہ کاش ایک بار خدا کو پکارتے

ڈوبے جو ناخدا کا سہارا لئے ہوئے

اے خامشی گزر بھی حد احتیاط سے

مدت ہوئی ہے نام کسی کا لئے ہوئے

اب زندگی نہ کھائے گی کوئی نیا فریب

اب دل نہیں کسی کی تمنا لئے ہوئے

آئے اگر بہار چمن میں تو خوش نہ ہو

جائے گی رنگ و بو کا جنازہ لئے ہوئے

دل میں ہے بزم حسن بھی فردوس عشق بھی

ہے اک لہو کی بوند بھی کیا کیا لئے ہوئے

کچھ ایسے غم زدہ بھی ہیں دنیا میں اے خلشؔ

روتے ہیں جو ہنسی کا سہارا لئے ہوئے