dil hai tumhaari yaad ki duniya liye hue

dil hai tumhārī yaad kī duniyā liye hue

maiñ bhī huuñ ek husn-e-sarāpā liye hue

mujh ko kiyā tabāh tire iltifāt ne

ye raushnī thī kitnā añdherā liye hue

vo kaash ek baar ḳhudā ko pukārte

Duube jo nāḳhudā kā sahārā liye hue

ai ḳhāmushī guzar bhī had-e-ehtiyāt se

muddat huī hai naam kisī kā liye hue

ab zindagī na khā.egī koī nayā fareb

ab dil nahīñ kisī kī tamannā liye hue

aa.e agar bahār chaman meñ to ḳhush na ho

jā.egī rañg-o-bū kā janāza liye hue

dil meñ hai bazm-e-husn bhī firdaus-e-ishq bhī

hai ik lahū kī buuñd bhī kyā kyā liye hue

kuchh aise ġham-zada bhī haiñ duniyā meñ ai 'ḳhalish'

rote haiñ jo hañsī kā sahārā liye hue

dil hai tumhaari yaad ki duniya liye hue

main bhi hun ek husn-e-sarapa liye hue

mujh ko kiya tabah tere iltifat ne

ye raushni thi kitna andhera liye hue

wo kash ek bar KHuda ko pukarte

Dube jo naKHuda ka sahaara liye hue

ai KHamushi guzar bhi had-e-ehtiyat se

muddat hui hai nam kisi ka liye hue

ab zindagi na khaegi koi naya fareb

ab dil nahin kisi ki tamanna liye hue

aae agar bahaar chaman mein to KHush na ho

jaegi rang-o-bu ka janaza liye hue

dil mein hai bazm-e-husn bhi firdaus-e-ishq bhi

hai ek lahu ki bund bhi kya kya liye hue

kuchh aise gham-zada bhi hain duniya mein ai 'KHalish'

rote hain jo hansi ka sahaara liye hue