dil hi girdab-e-tamanna hai yahin Dubte hain

dil hī girdāb-e-tamannā hai yahīñ Dūbte haiñ

apne hī ġham meñ tire ḳhāk-nashīñ Dūbte haiñ

dil faqīrāna thā mahr o mah o anjum na bane

ḳhas kī mānind rahe ham ki nahīñ Dūbte haiñ

ham agar Duube to kyā kaun se aaise ham the

shahr ke shahr jahāñ zer-e-zamīñ Dūbte haiñ

apnī rūposhī tah-e-ḳhāk muqaddar hai to kyā

Dūbne ko to sitāre bhī kahīñ Dūbte haiñ

nāḳhudā ho ki ḳhudā dekhte rah jaate haiñ

kashtiyāñ Dūbtī haiñ us ke makīñ Dūbte haiñ

paar utarnā hai to kyā mauj-e-balā kām-e-nahañg

dosto aao chalo pahle hamīñ Dūbte haiñ

ishq vo bahr 'mujībī' hai ki dekhā ham ne

ḳhār-o-ḳhas paar hue ahl-e-yaqīñ Dūbte haiñ

dil hi girdab-e-tamanna hai yahin Dubte hain

apne hi gham mein tere KHak-nashin Dubte hain

dil faqirana tha mahr o mah o anjum na bane

KHas ki manind rahe hum ki nahin Dubte hain

hum agar Dube to kya kaun se aaise hum the

shahr ke shahr jahan zer-e-zamin Dubte hain

apni ruposhi tah-e-KHak muqaddar hai to kya

Dubne ko to sitare bhi kahin Dubte hain

naKHuda ho ki KHuda dekhte rah jate hain

kashtiyan Dubti hain us ke makin Dubte hain

par utarna hai to kya mauj-e-bala kaam-e-nahang

dosto aao chalo pahle hamin Dubte hain

ishq wo bahr 'mujibi' hai ki dekha hum ne

KHar-o-KHas par hue ahl-e-yaqin Dubte hain