dil hi mera faqat hai matlab ka

dil hī merā faqat hai matlab kā

yā jigar bhī hai aap ke Dhab kā

qais o farhād se maiñ huuñ vāqif

ho chukā hai muqābla sab kā

khaa.ī hai ik na.ī miThā.ī aaj

bosa paayā hai yaar ke lab kā

mai-kade meñ sharāb piite haiñ

ye patā hai hamāre mashrab kā

shii.a sunnī meñ to bakheḌe haiñ

naam luuñ kis ke aage maz.hab kā

malak-ul-maut se kaho phir jaa.eñ

jīte-jī mar chukā huuñ maiñ kab kā

aap farmā.eñ hijr kā ahvāl

maiñ karūñ zikr vasl kī shab kā

sub.h ko jhoñke niiñd ke kaise

kahīñ jaagā huā hai tū shab kā

us ke kūcha kī bhiik chāhte haiñ

shauq jāgīr kā na mansab kā

rahe din bhar vo mudda.ī mere

yaad kar ke muāmla shab kā

barg-e-gul aa maiñ tere bose luuñ

tujh meñ hai Dhañg yaar ke lab kā

naqd-e-dil detā huuñ to kahte haiñ

vaah aisā 'saḳhī' hai tū kab kā

dil hi mera faqat hai matlab ka

ya jigar bhi hai aap ke Dhab ka

qais o farhad se main hun waqif

ho chuka hai muqabla sab ka

khai hai ek nai miThai aaj

bosa paya hai yar ke lab ka

mai-kade mein sharab pite hain

ye pata hai hamare mashrab ka

shia sunni mein to bakheDe hain

nam lun kis ke aage mazhab ka

malak-ul-maut se kaho phir jaen

jite-ji mar chuka hun main kab ka

aap farmaen hijr ka ahwal

main karun zikr wasl ki shab ka

subh ko jhonke nind ke kaise

kahin jaga hua hai tu shab ka

us ke kucha ki bhik chahte hain

shauq jagir ka na mansab ka

rahe din bhar wo muddai mere

yaad kar ke muamla shab ka

barg-e-gul aa main tere bose lun

tujh mein hai Dhang yar ke lab ka

naqd-e-dil deta hun to kahte hain

wah aisa 'saKHi' hai tu kab ka