dil hi the hum dukhe hue tumne dukha liya to kya

dil hī the ham dukhe hue tum ne dukhā liyā to kyā

tum bhī to be-amāñ hue ham ko satā liyā to kyā

aap ke ghar meñ har taraf manzar-e-māh-o-āftāb

ek charāġh-e-shām agar maiñ ne jalā liyā to kyā

baaġh kā baaġh aap kī dastaras-e-havas meñ hai

ek ġharīb ne agar phuul uThā liyā to kyā

lutf ye hai ki aadmī aam kare bahār ko

mauj-e-havā-e-rañg meñ aap nahā liyā to kyā

ab kahīñ boltā nahīñ ġhaib jo kholtā nahīñ

aisā agar koī ḳhudā tum ne banā liyā to kyā

jo hai ḳhudā kā aadmī us kī hai saltanat alag

zulm ne zulm se agar haath milā liyā to kyā

aaj kī hai jo karbalā kal pe hai us kā faisla

aaj hī aap ne agar jashn manā liyā to kyā

log dukhe hue tamām rañg bujhe hue tamām

aise meñ ahl-e-shām ne shahr sajā liyā to kyā

paḌhtā nahīñ hai ab koī suntā nahīñ hai ab koī

harf jagā liyā to kyā sher sunā liyā to kyā

dil hi the hum dukhe hue tum ne dukha liya to kya

tum bhi to be-aman hue hum ko sata liya to kya

aap ke ghar mein har taraf manzar-e-mah-o-aftab

ek charagh-e-sham agar main ne jala liya to kya

bagh ka bagh aap ki dastaras-e-hawas mein hai

ek gharib ne agar phul uTha liya to kya

lutf ye hai ki aadmi aam kare bahaar ko

mauj-e-hawa-e-rang mein aap naha liya to kya

ab kahin bolta nahin ghaib jo kholta nahin

aisa agar koi KHuda tum ne bana liya to kya

jo hai KHuda ka aadmi us ki hai saltanat alag

zulm ne zulm se agar hath mila liya to kya

aaj ki hai jo karbala kal pe hai us ka faisla

aaj hi aap ne agar jashn mana liya to kya

log dukhe hue tamam rang bujhe hue tamam

aise mein ahl-e-sham ne shahr saja liya to kya

paDhta nahin hai ab koi sunta nahin hai ab koi

harf jaga liya to kya sher suna liya to kya