dil hua teri nazar se faizyab

dil huā terī nazar se faizyāb

maiñ tirā jalva na tū merā hijāb

tum hasīnān-e-jahāñ meñ muntaḳhab

aur merā dil tumhārā intiḳhāb

un ko mujh se mujh ko un se hai hijāb

dekhiye pahle uThe kis kā naqāb

sarzamīn-e-dil meñ sar-garm-e-safar

the hazāroñ chāñd lākhoñ āftāb

mauj zāhir hai ki pech-o-tāb-e-mauj

mauj kyā hai dar-haqīqat pech-o-tāb

vo jise duniyā samajhtī hai sukūñ

dar-haqīqat hai kamāl-e-iztirāb

ḳhaak ban kar kū-e-jānāñ meñ rahe

aadmī ko varna miTTī hai ḳharāb

tā-ba-kai aa kar nizā’-e-kufr-o-dīñ

tum uThā do rū-e-rangīñ se naqāb

ḳhāksārī ham ko zebā hai 'zahīn'

ham ki haiñ dildār-gān-e-bu-tururāb

dil hua teri nazar se faizyab

main tera jalwa na tu mera hijab

tum hasinan-e-jahan mein muntaKHab

aur mera dil tumhaara intiKHab

un ko mujh se mujh ko un se hai hijab

dekhiye pahle uThe kis ka naqab

sarzamin-e-dil mein sar-garm-e-safar

the hazaron chand lakhon aaftab

mauj zahir hai ki pech-o-tab-e-mauj

mauj kya hai dar-haqiqat pech-o-tab

wo jise duniya samajhti hai sukun

dar-haqiqat hai kamal-e-iztirab

KHak ban kar ku-e-jaanan mein rahe

aadmi ko warna miTTi hai KHarab

ta-ba-kai aa kar niza’-e-kufr-o-din

tum uTha do ru-e-rangin se naqab

KHaksari hum ko zeba hai 'zahin'

hum ki hain dildar-gan-e-bu-tururab