دل حسن کے انداز سے مسحور بہت ہے

دل حسن کے انداز سے مسحور بہت ہے

آنکھ اس بت طناز کی مخمور بہت ہے

سنتے ہیں کہ ہے نزع میں دیدار کا وعدہ

دل موت کے اذکار سے مسرور بہت ہے

جلتی ہے زباں تذکرۂ شعلہ رخاں سے

دل شمع کی صورت مرا محروم بہت ہے

دنیا کی نگاہوں کا بجا خوف ہے اس کو

اظہار وفا کرنے میں مجبور بہت ہے

روکے نہیں رکتی ہیں تڑپتی ہوئی آہیں

دل ہجر میں اس شوخ کے رنجور بہت ہے

ہر سانس مزین ہے مری یاد سے اس کی

ہے دل سے قریں نظروں سے جو دور بہت ہے

ٹکڑے دل ناشاد کے اب جڑ نہیں سکتے

شیشہ اثر درد سے یہ چور بہت ہے

لب پر نہ شکایت ہو نہ آنکھوں سے گرے اشک

دشوار محبت کا یہ دستور بہت ہے

مل جاتا ہے منزل کا پتہ بھٹکے ہوؤں کو

ہر نقش قدم حسن کا پر نور بہت ہے

وہ مشق ستم شوق سے کرتے رہیں ہم پر

محبوب کی خاطر ہمیں منظور بہت ہے

محنت کا صلہ فاقہ و افلاس ہی پایا

تنگ آج کے زردار سے مزدور بہت ہے

شل ایسے ہوئے پاؤں اٹھائے نہیں جاتے

گو سامنے منزل ہے مگر دور بہت ہے

ہے ناز فضاؔ کو بھی بہت عشق پہ اپنے

گر حسن و نزاکت میں وہ مشہور بہت ہے