dil husn ke andaz se mashur bahut hai

dil husn ke andāz se mas.hūr bahut hai

aañkh us but-e-tannāz kī maḳhmūr bahut hai

sunte haiñ ki hai naza.a meñ dīdār kā vā'da

dil maut ke azkār se masrūr bahut hai

jaltī hai zabāñ tazkira-e-sho.ala-ruḳhāñ se

dil sham.a kī sūrat mirā mahrūm bahut hai

duniyā kī nigāhoñ kā bajā ḳhauf hai us ko

iz.hār-e-vafā karne meñ majbūr bahut hai

roke nahīñ ruktī haiñ taḌaptī huī aaheñ

dil hijr meñ us shoḳh ke ranjūr bahut hai

har saañs muzayyan hai mirī yaad se us kī

hai dil se qarīñ nazroñ se jo duur bahut hai

TukḌe dil-e-nāshād ke ab juḌ nahīñ sakte

shīsha asar-e-dard se ye chuur bahut hai

lab par na shikāyat ho na āñkhoñ se gire ashk

dushvār mohabbat kā ye dastūr bahut hai

mil jaatā hai manzil kā pata bhaTke huoñ ko

har naqsh-e-qadam husn kā pur-nūr bahut hai

vo mashq-e-sitam shauq se karte raheñ ham par

mahbūb kī ḳhātir hameñ manzūr bahut hai

mehnat kā sila fāqa-o-iflās hī paayā

tang aaj ke zardār se mazdūr bahut hai

shal aise hue paañv uThā.e nahīñ jaate

go sāmne manzil hai magar duur bahut hai

hai naaz 'fazā' ko bhī bahut ishq pe apne

gar husn-o-nazākat meñ vo mash.hūr bahut hai

dil husn ke andaz se mashur bahut hai

aankh us but-e-tannaz ki maKHmur bahut hai

sunte hain ki hai naza mein didar ka wa'da

dil maut ke azkar se masrur bahut hai

jalti hai zaban tazkira-e-shoala-ruKHan se

dil shama ki surat mera mahrum bahut hai

duniya ki nigahon ka baja KHauf hai us ko

izhaar-e-wafa karne mein majbur bahut hai

roke nahin rukti hain taDapti hui aahen

dil hijr mein us shoKH ke ranjur bahut hai

har sans muzayyan hai meri yaad se us ki

hai dil se qarin nazron se jo dur bahut hai

TukDe dil-e-nashad ke ab juD nahin sakte

shisha asar-e-dard se ye chur bahut hai

lab par na shikayat ho na aankhon se gire ashk

dushwar mohabbat ka ye dastur bahut hai

mil jata hai manzil ka pata bhaTke huon ko

har naqsh-e-qadam husn ka pur-nur bahut hai

wo mashq-e-sitam shauq se karte rahen hum par

mahbub ki KHatir hamein manzur bahut hai

mehnat ka sila faqa-o-iflas hi paya

tang aaj ke zardar se mazdur bahut hai

shal aise hue panw uThae nahin jate

go samne manzil hai magar dur bahut hai

hai naz 'faza' ko bhi bahut ishq pe apne

gar husn-o-nazakat mein wo mashhur bahut hai