dil itni kashakash se nikal jae to achchha

dil itnī kashākash se nikal jaa.e to achchhā

ye phuul kisī aag meñ jal jaa.e to achchhā

ma.ayūb jo lahje haiñ vo ma.atūb na hoñge

apnā hī ye andāz badal jaa.e to achchhā

insān ko insāñ hī kahā jaa.e to behtar

tashbīh-e-mah-o-mehr badal jaa.e to achchhā

be-nūr sitāroñ kī gavāhī ke bajā.e

mizhgāñ pe koī ashk machal jaa.e to achchhā

tarvīj-e-mohabbat ke liye sher kahūñgī

ye rog har ik zaat meñ pal jaa.e to achchhā

farsūda-ravī aisī ki ham ne bhī ye sochā

dil ku-e-malāmat se nikal jaa.e to achchhā

jis ne kabhī milne kī bhī parvā nahīñ kī hai

us tak jo 'nasīm' apnī ġhazal jaa.e to achchhā

dil itni kashakash se nikal jae to achchha

ye phul kisi aag mein jal jae to achchha

mayub jo lahje hain wo matub na honge

apna hi ye andaz badal jae to achchha

insan ko insan hi kaha jae to behtar

tashbih-e-mah-o-mehr badal jae to achchha

be-nur sitaron ki gawahi ke bajae

mizhgan pe koi ashk machal jae to achchha

tarwij-e-mohabbat ke liye sher kahungi

ye rog har ek zat mein pal jae to achchha

farsuda-rawi aisi ki hum ne bhi ye socha

dil ku-e-malamat se nikal jae to achchha

jis ne kabhi milne ki bhi parwa nahin ki hai

us tak jo 'nasim' apni ghazal jae to achchha