dil iztirab mein hai jigar iltihab mein

dil iztirāb meñ hai jigar iltihāb meñ

dekhā hai jab se maiñ ne kisī ko naqāb meñ

khul jaane meñ vo kaif aur vo dilkashī kahāñ

hai jab kisī kī sharm-o-hayā-o-hijāb meñ

maiñ khīñchtā huuñ haath sukūñ kī talāsh se

jab dekhtā huuñ ek jahāñ ko azaab meñ

ai shaiḳh kaash tū bhī kabhī pī ke dekhtā

hai talḳhī-e-hayāt kā darmāñ sharāb meñ

ye shoḳhiyāñ ye ġhaflateñ ye hoshyāriyāñ

andāz sau tarah ke haiñ tere shabāb meñ

kyā aaj bhī raheñgī sitāroñ se chashm-gīñ

kyā aaj bhī na ā.eñge vo māhtāb meñ

ik ik adā-e-husn hamārī nazar meñ hai

ulfat kī chāshnī hai nigāh-e-itāb meñ

'sā.ib' na pūchh hāl-e-dil-e-ġham-zadah na pūchh

har saañs merī in dinoñ hai iztirāb meñ

dil iztirab mein hai jigar iltihab mein

dekha hai jab se main ne kisi ko naqab mein

khul jaane mein wo kaif aur wo dilkashi kahan

hai jab kisi ki sharm-o-haya-o-hijab mein

main khinchta hun hath sukun ki talash se

jab dekhta hun ek jahan ko azab mein

ai shaiKH kash tu bhi kabhi pi ke dekhta

hai talKHi-e-hayat ka darman sharab mein

ye shoKHiyan ye ghaflaten ye hoshyariyan

andaz sau tarah ke hain tere shabab mein

kya aaj bhi rahengi sitaron se chashm-gin

kya aaj bhi na aaenge wo mahtab mein

ek ek ada-e-husn hamari nazar mein hai

ulfat ki chashni hai nigah-e-itab mein

'saib' na puchh haal-e-dil-e-gham-zadah na puchh

har sans meri in dinon hai iztirab mein