dil jalane se kahan dur andhera hoga

dil jalāne se kahāñ duur añdherā hogā

raat ye vo hai ki mushkil se saverā hogā

kyuuñ na ab vaz-e-junūñ tark kareñ lauT chaleñ

us se aage jo hai jañgal vo ghanerā hogā

ye zarūrī to nahīñ itnā bhī ḳhush-fahm na ban

vo zamāna jo na merā hai na terā hogā

itnā bhī sañg-e-malāmat se Darā mat nāseh

sar salāmat hai to is shahr kā pherā hogā

ḳhidmat-e-rāj-mahal par unheñ dekhā māmūr

jo ye kahte the ki sardār baserā hogā

rāh-e-pur-pech ko sahl itnā batāne vaalā

rāhbar ho nahīñ saktā hai luTerā hogā

vo bhī insān hai ai dil use ilzām na de

jaane us ko bhī kin āfāt ne gherā hogā

dil jalane se kahan dur andhera hoga

raat ye wo hai ki mushkil se sawera hoga

kyun na ab waz-e-junun tark karen lauT chalen

us se aage jo hai jangal wo ghanera hoga

ye zaruri to nahin itna bhi KHush-fahm na ban

wo zamana jo na mera hai na tera hoga

itna bhi sang-e-malamat se Dara mat naseh

sar salamat hai to is shahr ka phera hoga

KHidmat-e-raj-mahal par unhen dekha mamur

jo ye kahte the ki sardar basera hoga

rah-e-pur-pech ko sahl itna batane wala

rahbar ho nahin sakta hai luTera hoga

wo bhi insan hai ai dil use ilzam na de

jaane us ko bhi kin aafat ne ghera hoga