dil jalwa-gah-e-surat-e-jaanana ho gaya

dil jalva-gāh-e-sūrat-e-jānāna ho gayā

shīsha ye ek dam meñ parī-ḳhāna ho gayā

shab kyuuñ ki saltanat na kare tāj-e-zar se sham.a

rashk-e-par-e-humā par-e-parvāna ho gayā

kaifiyyatoñ se gardish-e-chashm-e-butāñ kī dil

shīsha kabhī banā kabhī paimāna ho gayā

tuġhyānī-e-sarishk se apnī bhī ba.ad-e-qais

dariyā kā paaT dāman-e-vīrāna ho gayā

zanjīr kyuuñ na us kī qadam-bos ho bhalā

jo koī tere ishq meñ dīvāna ho gayā

yaañ tak kiyā hai shohra-e-āfāq ishq ne

qissa mirā bhī ḳhalq meñ afsāna ho gayā

kyā roiye ḳharābī-e-iqlīm-e-dil ko dekh

āñkhoñ ke dekhte hī to kyā kyā na ho gayā

saaqī kidhar phire hai tū tanhā ba-rañg-e-jām

tujh bin ḳharāb in dinoñ mai-ḳhāna ho gayā

āñkhoñ se tujh ko yaad maiñ kartā huuñ roz-o-shab

be-dīd mujh se kis liye begāna ho gayā

bāvar nahīñ to ashk-e-musalsal ko dekh le

dast-e-mizha meñ sub.ha-e-sad-dāna ho gayā

kahte haiñ us ke silsila-e-zulf meñ 'nasīr'

dil bhī murīd ab sifat-e-shāna ho gayā

dil jalwa-gah-e-surat-e-jaanana ho gaya

shisha ye ek dam mein pari-KHana ho gaya

shab kyun ki saltanat na kare taj-e-zar se shama

rashk-e-par-e-huma par-e-parwana ho gaya

kaifiyyaton se gardish-e-chashm-e-butan ki dil

shisha kabhi bana kabhi paimana ho gaya

tughyani-e-sarishk se apni bhi baad-e-qais

dariya ka paT daman-e-virana ho gaya

zanjir kyun na us ki qadam-bos ho bhala

jo koi tere ishq mein diwana ho gaya

yan tak kiya hai shohra-e-afaq ishq ne

qissa mera bhi KHalq mein afsana ho gaya

kya roiye KHarabi-e-iqlim-e-dil ko dekh

aankhon ke dekhte hi to kya kya na ho gaya

saqi kidhar phire hai tu tanha ba-rang-e-jam

tujh bin KHarab in dinon mai-KHana ho gaya

aankhon se tujh ko yaad main karta hun roz-o-shab

be-did mujh se kis liye begana ho gaya

bawar nahin to ashk-e-musalsal ko dekh le

dast-e-mizha mein subha-e-sad-dana ho gaya

kahte hain us ke silsila-e-zulf mein 'nasir'

dil bhi murid ab sifat-e-shana ho gaya