dil jis se kanpta hai wo saat bhi aaegi

dil jis se kāñptā hai vo saa.at bhī aa.egī

vo aa.egā to koī musībat bhī aa.egī

maiñ aaj terī raah kā patthar sahī magar

kal tujh ko pesh merī zarūrat bhī aa.egī

jhele haiñ apnī jaan pe ham ne vo hādse

dil māntā nahīñ ki qayāmat bhī aa.egī

us kī kashīdgī kā sabab kuchh bhī ho magar

mujh ko gumāñ na thā ki ye naubat bhī aa.egī

ai rah-navard sāya-e-ashjār hī nahīñ

kuchh tere kaam dhuup kī hiddat bhī aa.egī

kyā fā.eda jo apnī safā.ī meñ kuchh kahūñ

maiñ jāntā thā mujh pe ye tohmat bhī aa.egī

dil jis se kanpta hai wo saat bhi aaegi

wo aaega to koi musibat bhi aaegi

main aaj teri rah ka patthar sahi magar

kal tujh ko pesh meri zarurat bhi aaegi

jhele hain apni jaan pe hum ne wo hadse

dil manta nahin ki qayamat bhi aaegi

us ki kashidgi ka sabab kuchh bhi ho magar

mujh ko guman na tha ki ye naubat bhi aaegi

ai rah-naward saya-e-ashjar hi nahin

kuchh tere kaam dhup ki hiddat bhi aaegi

kya faeda jo apni safai mein kuchh kahun

main jaanta tha mujh pe ye tohmat bhi aaegi