dil jo pahle hi se mahw-e-ruKH-e-jaanan hota

dil jo pahle hī se mahv-e-ruḳh-e-jānāñ hotā

kis liye zulf meñ phañstā jo pareshāñ hotā

ḳhaal kyūñkar na qarīb-e-ruḳh-e-jānāñ hotā

daulat-e-husn kā koī to nigahbāñ hotā

jazb karne ko na gar gosha-e-dāmāñ hotā

mere ashkoñ se bapā nuuh kā tūfāñ hotā

jalva-e-mus.haf-e-āriz jo nazar aa jaatā

hindavī ḳhaal bhī sau jaañ se musalmāñ hotā

qadr dīvānoñ kī sahrā-e-junūñ gar kartā

ḳhaar tak baḳhiya-gar-e-chāk-e-garebāñ hotā

rang to ḳhair masīhā.ī kahāñ se laatā

kyoñ ḳhajil lab se tire la.al na ījāñ hotā

qais-o-farhād kā phir naam na letā koī

mujh se ābād na gar koh-o-bayābāñ hotā

rū-kash-e-chehra-e-dildār vo hotā kyūñkar

daaġh khātā jo muqābil mah-e-kan.āñ hotā

dil se gar shauq shahādat kā na hotā mujh ko

misl-e-gul zaḳhm-e-jigar kis liye ḳhandāñ hotā

maiñ vo majnūñ huuñ ki sahrā meñ qadam gar rakhtā

aa ke pā-bos vahīñ ḳhār-e-muġhīlāñ hotā

beḌiyāñ toḌ ke ham zulf meñ jā kar phañste

gar kahīñ josh-e-junūñ silsila-jumbāñ hotā

aabrū vo mire rone kī jo kartā kuchh bhī

ashk se mere ḳhajil gauhar-e-ġhaltāñ hotā

bahra gar daulat-e-islām se kāfir paatā

ḳhāl-e-ruḳhsār-e-sanam hāfiz-e-qur.āñ hotā

ādat-e-rahm hasīnoñ meñ nahīñ jab 'tālib'

kyoñ mire qatl se vo turk pashemāñ hotā

dil jo pahle hi se mahw-e-ruKH-e-jaanan hota

kis liye zulf mein phansta jo pareshan hota

KHal kyunkar na qarib-e-ruKH-e-jaanan hota

daulat-e-husn ka koi to nigahban hota

jazb karne ko na gar gosha-e-daman hota

mere ashkon se bapa nuh ka tufan hota

jalwa-e-mushaf-e-ariz jo nazar aa jata

hindawi KHal bhi sau jaan se musalman hota

qadr diwanon ki sahra-e-junun gar karta

KHar tak baKHiya-gar-e-chaak-e-gareban hota

rang to KHair masihai kahan se lata

kyon KHajil lab se tere lal na ijaan hota

qais-o-farhad ka phir nam na leta koi

mujh se aabaad na gar koh-o-bayaban hota

ru-kash-e-chehra-e-dildar wo hota kyunkar

dagh khata jo muqabil mah-e-kanan hota

dil se gar shauq shahadat ka na hota mujh ko

misl-e-gul zaKHm-e-jigar kis liye KHandan hota

main wo majnun hun ki sahra mein qadam gar rakhta

aa ke pa-bos wahin KHar-e-mughilan hota

beDiyan toD ke hum zulf mein ja kar phanste

gar kahin josh-e-junun silsila-jumban hota

aabru wo mere rone ki jo karta kuchh bhi

ashk se mere KHajil gauhar-e-ghaltan hota

bahra gar daulat-e-islam se kafir pata

KHal-e-ruKHsar-e-sanam hafiz-e-quran hota

aadat-e-rahm hasinon mein nahin jab 'talib'

kyon mere qatl se wo turk pasheman hota