dil ka bura nahin magar shaKHs ajib Dhab ka hai

dil kā burā nahīñ magar shaḳhs ajiib Dhab kā hai

mujh se hai ḳhaas dushmanī vaise to yaar sab kā hai

dūriyoñ ne miTā diye jo bhī the qurbatoñ ke rañj

ab mirī baat baat meñ rañg tirī talab kā hai

mere lahū meñ thī ravāñ jab tire saañs kī mahak

jaane ye kab kī baat hai jaane ye zikr kab kā hai

ek zarā sī baat par badlī thī jab tirī nazar

tujh ko ḳhabar nahīñ magar dil to udaas tab kā hai

kyuuñ na dil-e-ḳhizāñ-nasīb har gul-e-tar ko chuum le

aaj to phuul phuul meñ zā.iqa us ke lab kā hai

kaif-o-nashāt-o-sar-ḳhushī nemateñ sab usī kī haiñ

mujh ko atā kiyā huā dard bhī mere rab kā hai

shaukat-o-shān-e-īzdī dil ne kahāñ se siikh lī

sab se hai be-niyāz bhī dhyān bhī us ko sab kā hai

raah dikhā.ī tak na dī tīra-shabī balā kī thī

aañkh na khul sakī mirī nuur bhī is ġhazab kā hai

hashr kā din bhī ho to kyā ye bhī nasīb hai mirā

din hai guzar hī jā.egā ḳhauf to mujh ko shab kā hai

dil ka bura nahin magar shaKHs ajib Dhab ka hai

mujh se hai KHas dushmani waise to yar sab ka hai

duriyon ne miTa diye jo bhi the qurbaton ke ranj

ab meri baat baat mein rang teri talab ka hai

mere lahu mein thi rawan jab tere sans ki mahak

jaane ye kab ki baat hai jaane ye zikr kab ka hai

ek zara si baat par badli thi jab teri nazar

tujh ko KHabar nahin magar dil to udas tab ka hai

kyun na dil-e-KHizan-nasib har gul-e-tar ko chum le

aaj to phul phul mein zaiqa us ke lab ka hai

kaif-o-nashat-o-sar-KHushi nematen sab usi ki hain

mujh ko ata kiya hua dard bhi mere rab ka hai

shaukat-o-shan-e-izdi dil ne kahan se sikh li

sab se hai be-niyaz bhi dhyan bhi us ko sab ka hai

rah dikhai tak na di tira-shabi bala ki thi

aankh na khul saki meri nur bhi is ghazab ka hai

hashr ka din bhi ho to kya ye bhi nasib hai mera

din hai guzar hi jaega KHauf to mujh ko shab ka hai