dil ka gulshan jala gae kanTe

dil kā gulshan jalā ga.e kāñTe

un kī yādeñ miTā ga.e kāñTe

ab zarūrat nahīñ rahī gul kī

itnī kasrat se aa ga.e kāñTe

ziist meñ rah ga.ī chubhan hī chubhan

aisā qabza jamā ga.e kāñTe

gul hī kyā gulsitāñ bhī hairāñ hai

is qadar mujh ko bhā ga.e kāñTe

ab to ḳhushiyoñ kī bū nahīñ miltī

har taraf ġham ke chhā ga.e kāñTe

un pe kaliyāñ bhī ho ga.iiñ shaidā

os meñ yuuñ nahā ga.e kāñTe

kyā kiyā tum ne ajnabī mohsin

raah se kyoñ haTā ga.e kāñTe

ab phaTā jā rahā hai merā dimāġh

kaisī ḳhushbū basā ga.e kāñTe

maiñ to mohsin unheñ samajhtā rahā

nafrateñ kyoñ baḌhā ga.e kāñTe

mujh ko ehsās tak na ho paayā

dost ban kar samā ga.e kāñTe

ham tumhāre bane rahe ham-dam

ḳhuub ehsāñ jatā ga.e kāñTe

roz-o-shab kā rahā na farq koī

niiñd aisī sulā ga.e kāñTe

kam nahīñ ham pe un kā ye ehsāñ

ramz-e-duniyā batā ga.e kāñTe

kaise azbar kitāb hotī mujhe

har sabaq phir bhulā ga.e kāñTe

jaise sāthī janam ke hoñ 'qudsī'

yuuñ gale se lagā ga.e kāñTe

dil ka gulshan jala gae kanTe

un ki yaaden miTa gae kanTe

ab zarurat nahin rahi gul ki

itni kasrat se aa gae kanTe

zist mein rah gai chubhan hi chubhan

aisa qabza jama gae kanTe

gul hi kya gulsitan bhi hairan hai

is qadar mujh ko bha gae kanTe

ab to KHushiyon ki bu nahin milti

har taraf gham ke chha gae kanTe

un pe kaliyan bhi ho gain shaida

os mein yun naha gae kanTe

kya kiya tum ne ajnabi mohsin

rah se kyon haTa gae kanTe

ab phaTa ja raha hai mera dimagh

kaisi KHushbu basa gae kanTe

main to mohsin unhen samajhta raha

nafraten kyon baDha gae kanTe

mujh ko ehsas tak na ho paya

dost ban kar sama gae kanTe

hum tumhaare bane rahe ham-dam

KHub ehsan jata gae kanTe

roz-o-shab ka raha na farq koi

nind aisi sula gae kanTe

kam nahin hum pe un ka ye ehsan

ramz-e-duniya bata gae kanTe

kaise azbar kitab hoti mujhe

har sabaq phir bhula gae kanTe

jaise sathi janam ke hon 'qudsi'

yun gale se laga gae kanTe