dil ka haq yun ada kare koi

dil kā haq yuuñ adā kare koī

dard ban kar rahā kare koī

dard meñ kuchh kamī sī lagtī hai

zaḳhm phir se harā kare koī

pahle rakh le vo jaañ hathelī par

phir mohabbat kiyā kare koī

husn kī ḳhud-supurdagī ke liye

'ishq kī intihā kare koī

mujh ko allāh par bharosa hai

ho jo dushman huā kare koī

jaane kyā kyā ye kahtā rahtā hai

kaise dil kā kahā kare koī

jab vafāoñ kī koī qadr nahīñ

kyoñ kisī se vafā kare koī

chhīn leñ jo kisī kī bīnā.ī

un ujāloñ kā kyā kare koī

ruḳh havāoñ kā dekh le pahle

jab bhī raushan diyā kare koī

rakhe malhūz haq-bayānī ko

shā'irī jab kiyā kare koī

sab yahāñ ajnabī se haiñ 'fārūq'

kis ko apnā kahā kare koī

dil ka haq yun ada kare koi

dard ban kar raha kare koi

dard mein kuchh kami si lagti hai

zaKHm phir se hara kare koi

pahle rakh le wo jaan hatheli par

phir mohabbat kiya kare koi

husn ki KHud-supurdagi ke liye

'ishq ki intiha kare koi

mujh ko allah par bharosa hai

ho jo dushman hua kare koi

jaane kya kya ye kahta rahta hai

kaise dil ka kaha kare koi

jab wafaon ki koi qadr nahin

kyon kisi se wafa kare koi

chhin len jo kisi ki binai

un ujalon ka kya kare koi

ruKH hawaon ka dekh le pahle

jab bhi raushan diya kare koi

rakhe malhuz haq-bayani ko

sha'iri jab kiya kare koi

sab yahan ajnabi se hain 'faruq'

kis ko apna kaha kare koi