dil ka har qatra-e-KHun rang-e-hina se mango

dil kā har qatra-e-ḳhūñ rañg-e-hinā se māñgo

ḳhūñ-bahā dosto qātil kī adā se māñgo

mat banāo yad-e-baizā ko gadā kā kashkol

vaqt fir.aun ho jab zarb-e-asā se māñgo

jab barasne se baḌhe tishna-labī kā ehsās

yūrish-e-barq hī sāvan kī ghaTā se māñgo

kab talak shāḳh-e-vafā lā.egī zaḳhmoñ ke gulāb

koī tāsīr na.ī āb-o-havā se māñgo

mom kī tarah pighal jā.egā shab kā faulād

dast-e-dā.ūd kī taufīq ḳhudā se māñgo

dil ka har qatra-e-KHun rang-e-hina se mango

KHun-baha dosto qatil ki ada se mango

mat banao yad-e-baiza ko gada ka kashkol

waqt firaun ho jab zarb-e-asa se mango

jab barasne se baDhe tishna-labi ka ehsas

yurish-e-barq hi sawan ki ghaTa se mango

kab talak shaKH-e-wafa laegi zaKHmon ke gulab

koi tasir nai aab-o-hawa se mango

mom ki tarah pighal jaega shab ka faulad

dast-e-daud ki taufiq KHuda se mango