dil ka ek ik dagh sham-e-zer-e-daman ho gaya

dil kā ik ik daaġh sham-e-zer-e-dāmāñ ho gayā

ham jahāñ pahuñche vahīñ jashn-e-charāġhāñ ho gayā

chāk-e-dil kī baat thī chāk-e-jigar kī baat thī

muft meñ rusvā mirā chāk-e-garebāñ ho gayā

raqs kar yuuñ ek ik band-e-anāsir TuuT jaa.e

ai junūñ pābandiyoñ se dil pareshāñ ho gayā

kis se pūchhūñ irtiqā kī kaun sī manzil hai ye

aadmī ḳhud aadmī kā dushman-e-jāñ ho gayā

chhoḌiye afsāna-e-insāñ ko insāñ ab kahāñ

vo to bechāra halāk-e-kufr-o-īmāñ ho gayā

phuul mahrūm-e-tabassum aur sabā ma.azūr-e-raqs

ye gulistāñ kyā huā ai 'naqsh' zindāñ ho gayā

dil ka ek ek dagh sham-e-zer-e-daman ho gaya

hum jahan pahunche wahin jashn-e-charaghan ho gaya

chaak-e-dil ki baat thi chaak-e-jigar ki baat thi

muft mein ruswa mera chaak-e-gareban ho gaya

raqs kar yun ek ek band-e-anasir TuT jae

ai junun pabandiyon se dil pareshan ho gaya

kis se puchhun irtiqa ki kaun si manzil hai ye

aadmi KHud aadmi ka dushman-e-jaan ho gaya

chhoDiye afsana-e-insan ko insan ab kahan

wo to bechaara halak-e-kufr-o-iman ho gaya

phul mahrum-e-tabassum aur saba mazur-e-raqs

ye gulistan kya hua ai 'naqsh' zindan ho gaya