dil ka maqsum tha mahw-e-gham-e-jaanan hona

dil kā maqsūm thā mahv-e-ġham-e-jānāñ honā

usī ā.īne se sīkhe koī hairāñ honā

apnī hī anjuman-e-shauq meñ ho naġhma-sarā

tang hai ġhair kī mahfil meñ ġhazal-ḳhvāñ honā

zindagī kyā hai tirī yaad tirā zikr-e-jamīl

bandagī kyā hai tire naam pe qurbāñ honā

dil ye kahtā hai pashemān-e-mohabbat ho jā

dard kahtā hai na minnat-kash-e-darmāñ honā

un se itnā na huā pursish-e-ġham hī karte

ham se dekhā na gayā jin kā pareshāñ honā

mujh ko ḳhush aa na sakā ġhairat-e-dīnī se farār

un ko raas aa gayā ġhārat-gar-e-īmāñ honā

āshiqī zabt hai aur zabt hai ra.anā.ī-e-zīst

ishq kī shaan nahīñ chāk-garebāñ honā

mujh ko un shoḳh nigāhoñ ne banāyā kāfir

jin ko manzūr na thā merā musalmāñ honā

haa.e us ashk-e-jigar-soz kī qismat 'fārūq'

jis kī qismat na ho palkoñ pe farozāñ honā

dil ka maqsum tha mahw-e-gham-e-jaanan hona

usi aaine se sikhe koi hairan hona

apni hi anjuman-e-shauq mein ho naghma-sara

tang hai ghair ki mahfil mein ghazal-KHwan hona

zindagi kya hai teri yaad tera zikr-e-jamil

bandagi kya hai tere nam pe qurban hona

dil ye kahta hai pasheman-e-mohabbat ho ja

dard kahta hai na minnat-kash-e-darman hona

un se itna na hua pursish-e-gham hi karte

hum se dekha na gaya jin ka pareshan hona

mujh ko KHush aa na saka ghairat-e-dini se farar

un ko ras aa gaya ghaarat-gar-e-iman hona

aashiqi zabt hai aur zabt hai ranai-e-zist

ishq ki shan nahin chaak-gareban hona

mujh ko un shoKH nigahon ne banaya kafir

jin ko manzur na tha mera musalman hona

hae us ashk-e-jigar-soz ki qismat 'faruq'

jis ki qismat na ho palkon pe farozan hona