dil ka mausam hai ajab tujhse mulaqat ke baad

dil kā mausam hai 'ajab tujh se mulāqāt ke baa'd

jaise jaltā huā jangal koī barsāt ke baa'd

talḳhī-e-hijr kā afsāna sunāne ke liye

kitnī rāteñ haiñ tire qurb kī ik raat ke baa'd

pahlī baar aa.ina sach bol rahā ho jaise

apnī pahchān huī tujh se mulāqāt ke baa'd

ham to samjhe the use dushman-e-dil qātil-e-jāñ

kyā kaheñ badlī huī sūrat-e-hālāt ke baa'd

rū-barū tere zabāñ par to na laa.e lekin

ham ne sochīñ ka.ī bāteñ tirī har baat ke baa'd

dil ne tai kī hai rifāqat kī ye manzil tanhā

hosh to chhoḌ gayā saath tire saath ke baa'd

dil ka mausam hai 'ajab tujh se mulaqat ke ba'd

jaise jalta hua jangal koi barsat ke ba'd

talKHi-e-hijr ka afsana sunane ke liye

kitni raaten hain tere qurb ki ek raat ke ba'd

pahli bar aaina sach bol raha ho jaise

apni pahchan hui tujh se mulaqat ke ba'd

hum to samjhe the use dushman-e-dil qatil-e-jaan

kya kahen badli hui surat-e-haalat ke ba'd

ru-baru tere zaban par to na lae lekin

hum ne sochin kai baaten teri har baat ke ba'd

dil ne tai ki hai rifaqat ki ye manzil tanha

hosh to chhoD gaya sath tere sath ke ba'd