dil kahta hai dekhunga tera tir-e-nazar toD

dil kahtā hai dekhūñgā tirā tīr-e-nazar toḌ

jis tarah mujhe toḌā hai us tarah jigar toḌ

qātil tujhe jab haal mire dil kā khulegā

ik tiir se pahle mire siine kī sipar toḌ

vo aa.e haiñ jī bhar ke unheñ dekh le tū bhī

ashkoñ kā zarā taar to ai dīda-e-tar toḌ

sarsabz to hone de zarā naḳhl-e-tamannā

nādāñ hai abhī ḳhaam na ulfat kā samar toḌ

bekār mujhe dekhtā hai tirchhī nazar se

tīr-e-nigah-e-yār mirā qalb-o-jigar toḌ

pahle se azaañ dene pe toḌī ga.ī minqār

dam vasl kī shab aaj to ai murġh-e-sahar toḌ

samjhūñgā 'shafīq' apnā maiñ tīr-e-nigah-e-yār

gar ek ishāre meñ mirā qalb-o-jigar toḌ

dil kahta hai dekhunga tera tir-e-nazar toD

jis tarah mujhe toDa hai us tarah jigar toD

qatil tujhe jab haal mere dil ka khulega

ek tir se pahle mere sine ki sipar toD

wo aae hain ji bhar ke unhen dekh le tu bhi

ashkon ka zara tar to ai dida-e-tar toD

sarsabz to hone de zara naKHl-e-tamanna

nadan hai abhi KHam na ulfat ka samar toD

bekar mujhe dekhta hai tirchhi nazar se

tir-e-nigah-e-yar mera qalb-o-jigar toD

pahle se azan dene pe toDi gai minqar

dam wasl ki shab aaj to ai murgh-e-sahar toD

samjhunga 'shafiq' apna main tir-e-nigah-e-yar

gar ek ishaare mein mera qalb-o-jigar toD