dil ke dard ke kam hone ka tanha kuchh saman hua

dil ke dard ke kam hone kā tanhā kuchh sāmān huā

ham bhī ab kai din jī leñge is kā bhī imkān huā

ek diye kī lau ne saarā shahr jalā kar ḳhaak kiyā

ek havā kā jhoñkā ban kar āñdhī aur tūfān huā

ārzūoñ kī nīchī saañs ne us dar par dastak dī

aur junūñ kā ik ik lamha mere ghar mehmān huā

vaqt kā kaTnā us se pūchho hijr meñ jis kī guzrī ho

ek ik lamha ek sadī thā kab ham par āsān huā

koī kisī kā miit nahīñ hai duniyā kahtī aa.ī hai

ham ne jis ko apnā jaanā vaqt pe vo anjān huā

'ishq uḌānoñ kā dushman hai kyā us ko mā'lūm na thā

dil kā panchhī qaid meñ aa kar kyuuñ itnā hairān huā

tanhā un kī gul-afshānī kuchh na pūchho kaisī hai

jab bhī hazrat-e-vā'iz bole sab kā jī halkān huā

dil ke dard ke kam hone ka tanha kuchh saman hua

hum bhi ab kai din ji lenge is ka bhi imkan hua

ek diye ki lau ne sara shahr jala kar KHak kiya

ek hawa ka jhonka ban kar aandhi aur tufan hua

aarzuon ki nichi sans ne us dar par dastak di

aur junun ka ek ek lamha mere ghar mehman hua

waqt ka kaTna us se puchho hijr mein jis ki guzri ho

ek ek lamha ek sadi tha kab hum par aasan hua

koi kisi ka mit nahin hai duniya kahti aai hai

hum ne jis ko apna jaana waqt pe wo anjaan hua

'ishq uDanon ka dushman hai kya us ko ma'lum na tha

dil ka panchhi qaid mein aa kar kyun itna hairan hua

tanha un ki gul-afshani kuchh na puchho kaisi hai

jab bhi hazrat-e-wa'iz bole sab ka ji halkan hua