dil ke darwaze pe dastak ki sada koi nahin

dil ke darvāze pe dastak kī sadā koī nahīñ

kaun sī manzil hai ye āvāz-e-pā koī nahīñ

majlis-e-ālām se kis tarah nikle zindagī

ye vo zindāñ hai ki jis kā rāsta koī nahīñ

karbalā to aaj bhī miltā hai har har gaam par

shahr meñ lekin husain-e-bā-vafā koī nahīñ

kuchh samajh kar hī kiyā hai maiñ ne us kā intiḳhāb

kyā huā us raah meñ gar naqsh-e-pā koī nahīñ

maiñ jo uTThā to uThā saarā zamāna mere saath

tum jo uTThe to uThā dil ke sivā koī nahīñ

ai shab-e-furqat kahāñ bhaTkegī chal mere hī ghar

ye vo bastī hai jahāñ raushan diyā koī nahīñ

ātish-e-ehsās meñ jalte raho 'shiblī' sadā

shā'irī se baḌh ke duniyā meñ sazā koī nahīñ

dil ke darwaze pe dastak ki sada koi nahin

kaun si manzil hai ye aawaz-e-pa koi nahin

majlis-e-alam se kis tarah nikle zindagi

ye wo zindan hai ki jis ka rasta koi nahin

karbala to aaj bhi milta hai har har gam par

shahr mein lekin husain-e-ba-wafa koi nahin

kuchh samajh kar hi kiya hai main ne us ka intiKHab

kya hua us rah mein gar naqsh-e-pa koi nahin

main jo uTTha to uTha sara zamana mere sath

tum jo uTThe to uTha dil ke siwa koi nahin

ai shab-e-furqat kahan bhaTkegi chal mere hi ghar

ye wo basti hai jahan raushan diya koi nahin

aatish-e-ehsas mein jalte raho 'shibli' sada

sha'iri se baDh ke duniya mein saza koi nahin