دل کے ہاتھوں شیشۂ ادراک بھی دھندلا کئے

دل کے ہاتھوں شیشۂ ادراک بھی دھندلا کئے

جو نہ دیکھا چاہئے تھا ہم وہی دیکھا کئے

دھول ہو اس درس گاہ علم کی کس کو نصیب

اپنی ہستی جی رہے ہیں ہم جہاں رسوا کئے

لمحہ بھر کو بھول بیٹھا میں کسی کا کچھ نہیں

اور مرے احباب مجھ کو کیا سے کیا سمجھا کئے

برف ہو کر عارضوں کی اک تمازت کے طفیل

مدتوں ہم آتش سیال سے پگھلا کئے

اک لکھے کو کتنا پڑھتے پڑھ چکے ہم عمر بھر

زندہ رہ کر زندگی کی چاہ میں تڑپا کئے

آسماں چھونے کی حسرت سب کو اس کے باوجود

سارے انساں تو نے جب کہ خاک سے پیدا کئے

زیب چہرہ تھیں خراشیں آئنے بھی دھند تھے

ہوش والے آنکھ رکھ کر واہمہ سمجھا کئے