dil ke hathon shisha-e-idrak bhi dhundla kiye

dil ke hāthoñ shīsha-e-idrāk bhī dhuñdlā kiye

jo na dekhā chāhiye thā ham vahī dekhā kiye

dhuul ho is dars-gāh-e-ilm kī kis ko nasīb

apnī hastī jī rahe haiñ ham jahāñ rusvā kiye

lamha bhar ko bhuul baiThā maiñ kisī kā kuchh nahīñ

aur mire ahbāb mujh ko kyā se kyā samjhā kiye

barf ho kar ārizoñ kī ik tamāzat ke tufail

muddatoñ ham ātish-e-sayyāl se pighlā kiye

ik likhe ko kitnā paḌhte paḌh chuke ham umar bhar

zinda rah kar zindagī kī chaah meñ taḌpā kiye

āsmāñ chhūne kī hasrat sab ko is ke bāvajūd

saare insāñ tū ne jab ki ḳhaak se paidā kiye

zeb-e-chehra thiiñ ḳharāsheñ aa.ine bhī dhund the

hosh vaale aañkh rakh kar vāhima samjhā kiye

dil ke hathon shisha-e-idrak bhi dhundla kiye

jo na dekha chahiye tha hum wahi dekha kiye

dhul ho is dars-gah-e-ilm ki kis ko nasib

apni hasti ji rahe hain hum jahan ruswa kiye

lamha bhar ko bhul baiTha main kisi ka kuchh nahin

aur mere ahbab mujh ko kya se kya samjha kiye

barf ho kar aarizon ki ek tamazat ke tufail

muddaton hum aatish-e-sayyal se pighla kiye

ek likhe ko kitna paDhte paDh chuke hum umar bhar

zinda rah kar zindagi ki chah mein taDpa kiye

aasman chhune ki hasrat sab ko is ke bawajud

sare insan tu ne jab ki KHak se paida kiye

zeb-e-chehra thin KHarashen aaine bhi dhund the

hosh wale aankh rakh kar wahima samjha kiye