dil ke har dagh ko sine se lagae rakhiye

dil ke har daaġh ko siine se lagā.e rakhiye

ḳhāna-e-dil meñ ye fānūs jalā.e rakhiye

zindagī vaqt ke sāñche meñ Dhalī jaatī hai

dīda-o-dil ko qarīne se sajā.e rakhiye

shām-e-ġham kā jo fasāna thā vo ab ḳhatm huā

sub.h-e-ummīd kā māhaul banā.e rakhiye

apne iḳhlās-o-mohabbat ke haiñ qaa.il sab log

zindagānī kā yahī rañg jamā.e rakhiye

maiñ abhī chupke se pī aatā huuñ maiḳhāne se

zāhidoñ ko zarā bātoñ meñ lagā.e rakhiye

rāz-dāñ apnā farishta nahīñ insāñ hī to hai

dil ke har raaz ko dil meñ hī chhupā.e rakhiye

ye jo hai fursat-e-imroz ġhanīmat hai 'shahīd'

aaj ke kaam ko kal par na uThā.e rakhiye

dil ke har dagh ko sine se lagae rakhiye

KHana-e-dil mein ye fanus jalae rakhiye

zindagi waqt ke sanche mein Dhali jati hai

dida-o-dil ko qarine se sajae rakhiye

sham-e-gham ka jo fasana tha wo ab KHatm hua

subh-e-ummid ka mahaul banae rakhiye

apne iKHlas-o-mohabbat ke hain qail sab log

zindagani ka yahi rang jamae rakhiye

main abhi chupke se pi aata hun maiKHane se

zahidon ko zara baaton mein lagae rakhiye

raaz-dan apna farishta nahin insan hi to hai

dil ke har raaz ko dil mein hi chhupae rakhiye

ye jo hai fursat-e-imroz ghanimat hai 'shahid'

aaj ke kaam ko kal par na uThae rakhiye