dil ke har zaKHm ko honTon pe sajaya jae

dil ke har zaḳhm ko hoñToñ pe sajāyā jaa.e

kyā zarūrī hai ki haal apnā sunāyā jaa.e

āñsuoñ meñ tirī sūrat ko sajāyā jaa.e

bahte paanī pe bhī ik naqsh banāyā jaa.e

ab mujhe dekh ke kahte haiñ ye ā.īna-mizāj

ek shaḳhs aur thā shāyad kahīñ paayā jaa.e

kis ke bas meñ hai mirī tarh salīboñ kā safar

apne har ḳhvāb ko suulī pe chaḌhāyā jaa.e

aaj kī raat mulāqāt kā jaadū na sahī

aaj in āñkhoñ meñ nīñdoñ ko jagāyā jaa.e

dil kī aag aur baḌhā dete haiñ bahte aañsū

kyā kare vo jise paanī se jalāyā jaa.e

jurm sā jurm hai merā ki huuñ ik naqsh-e-vafā

dosto mujh ko abhī aur miTāyā jaa.e

us ke hoñToñ pe mire she'r ta'ajjub hai mujhe

mere afkār ko phūloñ meñ basāyā jaa.e

'badr' achchhā hai numā.ish na ho dāġh-e-dil kī

apne ghar meñ hī charāġh apnā jalāyā jaa.e

dil ke har zaKHm ko honTon pe sajaya jae

kya zaruri hai ki haal apna sunaya jae

aansuon mein teri surat ko sajaya jae

bahte pani pe bhi ek naqsh banaya jae

ab mujhe dekh ke kahte hain ye aaina-mizaj

ek shaKHs aur tha shayad kahin paya jae

kis ke bas mein hai meri tarh salibon ka safar

apne har KHwab ko suli pe chaDhaya jae

aaj ki raat mulaqat ka jadu na sahi

aaj in aankhon mein nindon ko jagaya jae

dil ki aag aur baDha dete hain bahte aansu

kya kare wo jise pani se jalaya jae

jurm sa jurm hai mera ki hun ek naqsh-e-wafa

dosto mujh ko abhi aur miTaya jae

us ke honTon pe mere she'r ta'ajjub hai mujhe

mere afkar ko phulon mein basaya jae

'badr' achchha hai numaish na ho dagh-e-dil ki

apne ghar mein hi charagh apna jalaya jae