dil ke jalte hue zaKHmon ka mudawa ban kar

dil ke jalte hue zaḳhmoñ kā mudāvā ban kar

phuul mahke haiñ tire haath kā saaya ban kar

maiñ tire jism ko chhūte hue yuuñ Dartā huuñ

tishnagī aur baḌhā degā tū dariyā ban kar

kyā Darā.eñge muqaddar ke añdhere tujh ko

maiñ chamaktā huuñ tire haath pe rekhā ban kar

vaqt hai barf kī dīvār to kaise pighle

ḳhuuñ bhī āñkhoñ se Tapaktā nahīñ sho'la ban kar

haath aayā nahīñ kuchh sañg-e-malāmat ke sivā

shahr meñ dekh liyā ham ne tamāshā ban kar

hādsa koī ho bujhtī nahīñ āñkhoñ kī chamak

jism meñ phail gayā hai vo ujālā ban kar

aa.ine saaf the kis kis ko vahāñ jhuTlātā

har siyāhī nazar aa.ī mirā chehra ban kar

tishnagī laakh sahī ghar se na niklo 'rāshid'

raat siine meñ utar jā.egī sahrā ban kar

dil ke jalte hue zaKHmon ka mudawa ban kar

phul mahke hain tere hath ka saya ban kar

main tere jism ko chhute hue yun Darta hun

tishnagi aur baDha dega tu dariya ban kar

kya Daraenge muqaddar ke andhere tujh ko

main chamakta hun tere hath pe rekha ban kar

waqt hai barf ki diwar to kaise pighle

KHun bhi aankhon se Tapakta nahin sho'la ban kar

hath aaya nahin kuchh sang-e-malamat ke siwa

shahr mein dekh liya hum ne tamasha ban kar

hadsa koi ho bujhti nahin aankhon ki chamak

jism mein phail gaya hai wo ujala ban kar

aaine saf the kis kis ko wahan jhuTlata

har siyahi nazar aai mera chehra ban kar

tishnagi lakh sahi ghar se na niklo 'rashid'

raat sine mein utar jaegi sahra ban kar