dil ke kahne mein na diwane kahin aa jaana

dil ke kahne meñ na dīvāne kahīñ aa jaanā

qadr kho detā hai har roz kā ānā-jānā

bharī mahfil meñ mujhe luuT liyā ho jaise

mujh pe paḌte hī nazar haa.e vo sharmā jaanā

uf tirī zulf bikharne kā vo qātil manzar

ruḳh pe lahrānā vo lahrāte hī bal khā jaanā

ab to le de ke tirī yaad kā hai ek hī kaam

bār-bār aanā aur aa kar mujhe taḌpā jaanā

shukr hai ḳhair ye manzil to mayassar aa.ī

apnī hastī ko tire husn kā pardā jaanā

ḳhaak hī kyoñ hameñ dar-dar kī uḌānā paḌtī

ye baḌī bhuul huī jo tujhe apnā jaanā

ham tirī sāda-mizājī hī kaheñge is ko

aap hī aap vo kuchh soch ke ghabrā jaanā

vo añdheroñ meñ bhaTakne hī lagā kyoñ jis ne

mish.al-e-rāh tirā naqsh-e-kaf-e-pā jaanā

ai 'shafaq' pūchho na kyā dil pe mire biit ga.ī

duur hī se vo mujhe dekh ke katrā jaanā

dil ke kahne mein na diwane kahin aa jaana

qadr kho deta hai har roz ka aana-jaana

bhari mahfil mein mujhe luT liya ho jaise

mujh pe paDte hi nazar hae wo sharma jaana

uf teri zulf bikharne ka wo qatil manzar

ruKH pe lahrana wo lahraate hi bal kha jaana

ab to le de ke teri yaad ka hai ek hi kaam

bar-bar aana aur aa kar mujhe taDpa jaana

shukr hai KHair ye manzil to mayassar aai

apni hasti ko tere husn ka parda jaana

KHak hi kyon hamein dar-dar ki uDana paDti

ye baDi bhul hui jo tujhe apna jaana

hum teri sada-mizaji hi kahenge is ko

aap hi aap wo kuchh soch ke ghabra jaana

wo andheron mein bhaTakne hi laga kyon jis ne

mishal-e-rah tera naqsh-e-kaf-e-pa jaana

ai 'shafaq' puchho na kya dil pe mere bit gai

dur hi se wo mujhe dekh ke katra jaana