dil ke makan mein aankh ke aangan mein kuchh na tha

dil ke makāñ meñ aañkh ke āñgan meñ kuchh na thā

jab ġham na thā hayāt ke dāman meñ kuchh na thā

ye to zarā batāo hameñ ahl-e-kārvāñ

un rahbaroñ meñ kyā hai jo rahzan meñ kuchh na thā

zulmat kā jab tilism na TuuTā nigāh se

raushan huā ki dīda-e-raushan meñ kuchh na thā

vo to bahār kā hameñ rakhnā paḌā bharam

varna ye vāqi.a hai ki gulshan meñ kuchh na thā

mujh par ba-taur-e-ḳhās thī us kī nigāh-e-lutf

kahtā maiñ kis tarah mire dushman meñ kuchh na thā

ye bhī durust hai ki nasheman meñ barq thī

ye bhī ġhalat nahīñ ki nasheman meñ kuchh na thā

'fāzil' ruḳh-e-hayāt pe yuuñ thiiñ masarrateñ

jaise ġham-e-hayāt kī uljhan meñ kuchh na thā

dil ke makan mein aankh ke aangan mein kuchh na tha

jab gham na tha hayat ke daman mein kuchh na tha

ye to zara batao hamein ahl-e-karwan

un rahbaron mein kya hai jo rahzan mein kuchh na tha

zulmat ka jab tilism na TuTa nigah se

raushan hua ki dida-e-raushan mein kuchh na tha

wo to bahaar ka hamein rakhna paDa bharam

warna ye waqia hai ki gulshan mein kuchh na tha

mujh par ba-taur-e-KHas thi us ki nigah-e-lutf

kahta main kis tarah mere dushman mein kuchh na tha

ye bhi durust hai ki nasheman mein barq thi

ye bhi ghalat nahin ki nasheman mein kuchh na tha

'fazil' ruKH-e-hayat pe yun thin masarraten

jaise gham-e-hayat ki uljhan mein kuchh na tha